Balitang Tagalog

"Greetings Earthlings... " =)

2007-01-23T13:26:08Z

Kakasimula ko lang po kaya sana tulungan nyo ko... <*Nagmamakaawa*>

Pano ba po ang pasikot sikot dito sa LJ? um.. Chester po ang name ko, <*sorry to all "NON-tagalog guys out there"*>
um... kakasimula ko palang po kasi dito and i want to know more about this thing called "COMMUNITY" thingy.. <*ubo*>
salamat po sa lahat ng suporta <*applause*> at sa lahat po ng makikita ang post na ito, salamat <*applause*>
at sa lahat po na... <*drumroll*> maiintindihan ang kalagayan ko... salamat po <*applause*>..
i'm 15 nga po pala...

amen. <*crus*> thanks po... 0_o

WALANG PLANO SA DUMAGSANG TAO!

2006-02-06T15:29:41Z

WALANG PLANO SA DUMAGSANG TAO!

Nina Noel Abuel, Kiko Cueto at Armida Rico

Mabaliw-baliw ang matandang babaeng ito na nakilala lamang sa pangalang Aling Toyang habang umiiyak na hinahanap ang mga apo na Biyernes ng hapon pa aniya’y nagtungo na sa Ultra para manood ng 1st anniversary ng Wowowee. Sabado ng umaga nang magkaroon ng stampede sa nasabing lugar kung saan namatay ang 79-katao. (Francis Malasig)

Nadiin nang husto ang diumano’y kawalan ng paghahanda ng pamunuan ng ABS-CBN Channel 2 sa seguridad ng libu-libong taong dumagsa sa unang anibersaryo ng noontime game show ‘Wowowee’ kaya’t nangyari ang stampede sa Ultra, Pasig City.

Ito ang lumalabas sa isinasagawang imbestigasyon ng Task Force Ultra sa nasabing trahedya na kumitil ng 79 katao (unang iniulat na 88, base sa talaan ng Philippine National Red Cross) at pagkasugat ng mahigit sa 600 pa.

Sa pagharap kahapon ni Rene Luspo, ABS-CBN assistant vice-president for security sa isinasagawang imbestigasyon ng TF Ultra sa pangunguna ni DILG Usec. Marius Corpuz kasama ang mga kinatawan mula sa National Telecommunications Commission (NTC), Bureau of Fire Protection, Department of Health at Philippine National Police (PNP), umikot ang katanungan kung ano ang ginawang contingency plan para bantayan ang loob at labas ng Ultra.

CONTINGENCY PLAN

Ikinagulat ng mga miyembro ng fact-finding committee kung bakit Miyerkules ng gabi pa lamang, alam na ng giant network na parami na nang parami ang mga dumadagsang tao, pero walang ginawang plano si Luspo.

Inihayag naman ng security head ng Dos na hindi na kailangan pang gawan ng pormal na plano ang pagmamantini ng seguridad dahil ibinabase na lamang, aniya, ito sa daloy ng sitwasyon. Ito’y sa kabila ng pag-amin din ni Luspo na may natanggap silang impormasyong na posibleng magkagulo sa pila sa ‘Wowowee’.

Pinilit ding pigain ni Usec. Corpuz si Luspo kung totoong isang Rey Cayabyab, umano’y isa sa staff ng ABS-CBN, ang nagsabi sa mga taon na 30-katao lamang ang mabibigyan ng raffle ticket na mananalo ng P5,000. Si Cayabyab din umano ang nagpauwi sa mga tao dahil hindi na magkakasya sa loob ng stadium.

Hindi man tuwiran, sinabi ni Luspo na bahagi ng kanilang ideyang pauwiin na lamang ang mga taong nasa labas ng Ultra, ngunit hindi umano niya alam kung ginawa ba ito ng production staff ng ABS-CBN.

"Bakit n’yo pauuwiin ang mga tao kung alam n’yo nang nandoon na sila ng ilang gabi na?" tanong naman ni Corpuz.

Magugunitang base sa inisyal na imbestigasyon, nagkaroon ng pagtutulakan mula sa likurang bahagi ng pila nang matunugan ng mga taong isasara na ang gate ng Ultra at hindi na magpapapasok pa. Ito umano ang pinag-ugatan ng stampede.

DI INAASAHAN ANG PAGDAGSA NG TAO

Lumalabas pa sa naturang hearing na hindi inaasahan ng ABS-CBN na dadagsa ang humigit-kumulang sa 20,000-katao upang makisali sa engrandeng pa-raffle ng ‘Wowowee’.

Inamin ni Luspo, na maging sila ay nagulat sa dami ng tao subalit hindi umano sila nagpabaya at naglagay ang mga ito ng guwardiyang mangangalaga sa kaayusan ng mga dumagsa. Ipinaliwanag nito na maliban sa 20 nakatalagang guwardiya ay naglagay rin ang mga ito ng mga barrier sa kahabaan ng Cpt. Javier Street kung saan nakalagay ang entrance papasok sa loob ng Ultra.

Bago ito’y inihayag ni Luspo na aabot sa 215 security personnel ang itinalaga sa Ultra kung saan 100 dito ang mula sa kanilang in-house security, 60 mula sa mismong security ng Ultra, 20 mula sa Pasig City Police, 15 traffic policemen at 20 village watchmen. Lahat ng mga ito’y ipinakalat umano sa labas ng stadium para makontrol ang mga tao.

DI SAPAT ANG GUWARDIYA

Subalit sa panig ng PNP partikular ng Eastern Police District (EPD), sinabi nitong hindi sapat ang bilang ng mga guwardiyang itinalaga sa labas ng Ultra para mangalaga sa kaayusan ng tao kung saan nabigong makontrol din ang aktuwasyon ng marami sa mga itong nag-uunahang makapasok sa loob ng naturang stadium.

Una nang inamin ni Luspo na bago ang stampede ay may nauna nang stampede nang magkatulakan ngunit nagawan umano nila ito ng paraan subalit ang ikalawang tulak ay hindi na umano nakayanan kung kaya’t nangyari ang stampede na nagresulta sa pagkapatung-patong ng mga tao.

Base sa mga naunang pahayag ni Corpuz, inihayag nitong nakausap niya ang ilang security staff at personnel sa stadium at lumalabas umanong maaaring nagkaroon ng kabiguan ang ABS-CBN na magpatupad ng crowd control measures.

"There were 30,000 people as of Friday...there was an emergency meeting (among the show’s staff and stadium personnel) but there was no plan to deal with the crowd. That is what we initially think," ani Corpuz.

Inaasahan naman ngayong araw ng Lunes ay haharap sina Charo Santos-Concio, executive vice president at entertainment head at ang host ng ‘Wowoweee’ na si Willie Revillame.

Kahapon ay hindi hinarap nina Concio at Revillame ang imbitasyon ng TF Ultra habang nasa labas ng gusali ng DILG kung saan tanging pinaharap lamang ng ABS-CBN ay si Luspo.

INSTANT GINHAWA

Samantala, sinabi ni Dr. Margarita Holmes, kilalang psychologist, na ang pag-asang makaamot ng konting swerte ang nagtulak sa mga mahihirap na Pinoy para dagsain ang ‘Wowowee’ anniversary kamakalawa.

Aniya, balewala ang ilang araw na pagod, gutom at pagtitiis ng ilang araw para sa mga taong nais makatikim ng ‘instant ginhawa’ na iniaalok ng ganitong uri ng programa.

Maliban dito, nakikita rin umano ito ng mga Pinoy na isang social occasion. "Ang pangangailangan (sa pera), malaking-malaking punto ‘yun pero I Think it can be a social occasion. Pupunta kayo, ang pamilya n’yo, mga barkada, sama-samang pipila. ‘Yun bang feeling na kapag pumila ka, may pag-asa," ani Holmes.

UNANG STAMPEDE

Hindi na bago pa ang trahedya ng stampede sa ABS-CBN dahil noong Enero 20, 2000, 32 katao ang nasugatan nang magkatulakan din ang may 20,000 kataong sumugod sa gate ng giant network para sumali sa noo’y ‘Pera o Bayong’ contest ng nasabing TV station.

Gaya ng naganap sa Ultra, hindi rin nakontrol ng mga guwardiya ng Dos ang biglaang pagtutulakan ng mga tao nang magbukas ang ‘audience gates’ ng mga ito.

Kabilang sa mga nasugatan sa nabanggit na sakuna ang isang 9-anyos na batang babae na nagkaroon ng injuries sa kaliwang bahagi ng kanyang ulo at isang matandang babae na inatake sa puso.

Ang ‘Pera o Bayong’ contest ay bahagi ng noo’y ‘Magandang Tanghali Bayan’ noontime show kung saan host din si Willie Revillame na nagsisilbi ring host ngayon ng ‘Wowowee’. (Kiko Cueto/Nilo Marasigan)

www.abante.com.ph/issue/feb0606/news1.htm

Interesado ako sa mga balita na galing s Pinas! :)

2005-12-20T10:34:14Z

Hi to all! Kumusta? Ka-reregister ko lang sa LJ, at hindi pa ako sanay sa paghanap dito, pero nahanap ko ang inyong BALITA. Napakainteresante ang pages ninyo sa akin, kasi gusto ko sana malaman ang mga balita na galing sa Pinas :)

Taga-Mosku ako, Rusa, pero specialist ako sa Tagalog, kaya kailangan ko ang bagung impormasyon ukol sa Pinas at gusto ko ring magpraktika ng Tagalog.
Regular ba ang pagdadagdag ng mga balita sa inyong pahina? bibisita ako nito nang madalas para malaman ang news ;))

Mayroon akong ilang kaibigan dito sa LJ na nag-aaral ng Tagalog. Puwede ba kayong magpayo sa amin ng iba pang LJ users o pages na nauukol sa Tagalog?

Nasisiya akong makilala kayo! ;)

Adik

2005-03-09T12:25:40Z

Adik sa 'Pinas pabata ng pabata

DAGUPAN CITY — Pinangangambahang mga adik sa pinatuyong dahon ng marijuana ang mag-aaral sa elementarya sa central Pangasinan makaraang madiskubre ng Philippine Drug Enforcement Agency (PDEA) na nakabase sa nasabing lalawigan na kalat na ang ipinagbabawal na halaman.

Ayon kay P/Chief Inspector Christopher Abrahano, provincial director ng PDEA, nagsimulang maadik sa pinatuyong dahon ng marijuana ang ilang grade 5 at 6 sa bayan ng central Pangasinan.

"Gumagamit na ng marijuana ang ilang mag-aaral at pagkatapos ay posibleng gumamit ng shabu (metamphetamine hydrochloride)", dagdag pa ani Abrahano. Sa ulat, ilang drug pusher ang nadakma na ng mga tauhan ng PDEA na ang puntirya ay magpakalat ng pinatuyong dahon ng marijuana sa elementarya ng nasabing bayan. Nakalagay sa maliit na sisidlan ang marijuana na naipagbibili sa halagang P50 hanggang P200 at ang modus operandi ng sindikato ay alukin nang libreng patikim ng bawal na dahon ang biktima hanggang sa tuluyang malulong.

Kalimitang nalululong sa marijuana ay mga nagtapos sa elementarya na na-recruit sa fraternity bago pa mag-high school.

"Sa kasalukuyan ay masyadong tumaas ang presyo ng shabu, kaya lahat ng adik ay pinaniniwalaang kumukuha ng marijuana," pahayag ni Abrahano.

Nabatid na ang pinagmumulan ng marijuana na ipinakakalat sa Pangasinan ay mula sa tri boundries ng Benguet, La Union at Ilocos Sur.

Nanawagan naman si Abrahano sa mga guro ng eskuwelahan ng central Pangasinan na isama sa curriculum ang drug awareness at lalong pag-ibayuhin ang seguridad na walang makapapasok na estranghero sa loob ng compound ng eskuwelahan. (Ulat ni Eva Visperas)

Pilipino STAR Ngayon 03/09/2005

Ay!!!

2005-03-06T06:27:45Z

PISCES (Peb. 19-Mar. 20) – Kahit alam mong tama ka, lalong mabuti kung huwag nang makialam sa iba. Harapin ang sariling suliranin dahil may kalutasan kung pagtutuunan ng pansin. Magbibigay ng positibong resulta kung sisimulan kaagad ang binabalak. Lucky numbers at color of the day ang 14-19-21-39 at fuschia.

ARIES (Mar. 21-Abr. 19) – Magtatagumpay sa nilalakad kung sa umaga isasakatuparan. Magaan ang pasok ng pera. Ang daloy ng komunikasyon ay mabilis at may mga magandang balitang matatanggap. Maganda ang takbo ng pangangalakal. Lucky numbers at color of the day ang 2-14-29-35 at ocean blue.

TAURUS (Abr. 20-May 20) – Ang tahanan o pinapasukan ay mapagtutuunan ng pansin. Magiging mainitin ang ulo sa mga kaguluhang makikita. Hinahon ang kailangan nang walang masaktang damdamin. Lucky numbers at color of the day ang 5-12-25-31 at lavender.

GEMINI (May 21-Hun. 21) – Huwag magmadali. Hintayin ang tamang oras at pagkakataon sa gustong mangyari. Maraming gustong gawing pagbabago ngunit mahihirapang magpaliwanag sa kinauukulan. Maging tapat sa gustong mangyari. Iwasang makipagsisihan dahil wala itong ibubungang mabuti. Lucky numbers at color of the day ang 10-12-14-31 at light green.

CANCER (Hun. 22-Hul. 22) – Dagdagan ang tiyaga at panalangin upang makaiwas sa kapalpakan. Maraming pagkakamali ang magagawa ngayon. Hinahon at dahan-dahan ang kailangan. Mag-ingat sa pakikipag-ugnayan sa komunikasyon o sa iba dahil ang kapareha ay matinding magselos. Lucky numbers at color of the day ang 6-14-19-24 at green.

LEO (Hul. 23-Ago. 22) – Malaki ang tiwala sa sarili at positibo ang pag-iisip sa mga gawain o ginagawa. Walang suliranin sa pamilya o minamahal. Nasa tamang landas ng kasaganaan ang tinatahak sa kabuhayan at pag-ibig. Lucky numbers at color of the day ang 10-14-35-36 at blue.

VIRGO (Ago. 23-Set. 23) – Malamang manghiram ng pera ang isang kaibigan o kamag-anak subalit dapat tanggihan dahil matatagalan bago mabayaran. Huwag magalit sa payong maririnig. Mabuting pag-aralang mabuti bago magdesisyon. Lucky numbers at color of the day ang 8-16-24-30 at gray.

LIBRA (Set. 24-Okt. 23) – Mag-relax o mamasyal dahil makatutulong itong mapanumbalik ang enerhiya ng kasiglahan. Magiging makitid ang isip kaya iwasang mapikon at madaling mag-init ang ulo. Iwasan ang maglasing at magsugal, gayundin ang mga biruan at kantiyawan. Lucky numbers at color of the day ang 8-10-13-25 at orange.

SCORPIO (Okt. 24-Nob. 22) – Anumang paanyaya ay dapat tanggihan. Iwasan ang sosyalan. Pag-aralang mabuti ang kasulatan o kasunduan bago lagdaan. Kung may balak maglakbay, ipagpaliban dahil mag-aaksaya lamang ng panahon. Lucky numbers at color of the day ang 5-15-24-30 at pink.

SAGITTARIUS (Nob. 23-Dis. 21) – May mag-aalok ng trabaho subalit mas magandang pag-aralan munang mabuti at timbangin ang kabutihang ibibigay kaysa kasalukuyang trabaho. Nasa pagitan ng pagkakamali at tama. Panalangin ang kailangan upang magkaroon ng patnubay at tamang desisyon. Lucky numbers at color for the day ang 16-20-31-42 at maroon.

CAPRICORN (Dis. 22-Ene. 19) – Ang tunay na kaibigan ay makikilala sa oras ng kagipitan. Ngayon mapapatunayan at makikilala ang tunay mong kaibigan. Magandang balita dahil magiging maligaya ang pag-ibig. Huwag padala sa sulsol ng iba. Lucky numbers at color of the day ang 8-16-19-30 at dollar green.

AQUARIUS (Ene. 20-Peb. 18) – Nasa kondisyon at kasiglahan at handang harapin ang anuman. Magiging masayahin na halos lahat ng kakilala ay magugulat sa asal na makikita. Mag-ingat dahil isang kaibigan ang malamang magtraydor. Iwasan ang mga tsismisan. Lucky numbers at color of the day ang 1-9-12-28 at cream.

Ni Madam Rosa
Pilipino STAR Ngayon 03/06/2005

780,483 documented OFWs nakakalat sa abroad

2005-01-29T14:07:40Z

INIHAYAG kahapon ni Labor and Employment Acting Secretary Manuel G. Imson na ang deployment ng documented overseas Filipino workers (OFWs) sa ibang bansa ay umabot nang halos 800,000 habang ang inward OFW remittances ay tumaas nang 9.42 porsyento sa US$6.196 billion (halos P350 bilyon) mula Enero hanggang Setyembre ngayong taon kumpara sa $5.662 bilyon sa katulad ding panahon ng nakaraang taon.

Inihayag ni Imson ang datos ng Philippine Overseas Employment Administration (POEA) na nagpapakita na mahigit 780,483 land-and sea-based OFWs ang ipinakalat mula Enero 1 hanggang Nobyembre 19, 2004, lumagpas sa 772,560 OFWs na naipadala noong nakaraang taon ng katulad ding panahon.

Inihayag pa ng opisyal na ang hiring at rehiring ng parehong land-based OFWs at overseas Filipino seafarers ay umangat ngayong taon. Dagdag pa niya, base sa datos noong Nobyembre 19, 2004, ang deployment ng land-based OFWs ay umabot ng 580,630 mula sa 578,914, habang ang seafarers ay umabot ng 199,853 mula sa dating 193,646 ng katulad ding panahon.

Tiwala rin si Imson na ang total OFW remittances para sa 2004 ay aabot nang US$8 bilyon lagpas sa US$7.6 bilyon ng nakaraang taon.

Binigyang-diin niya na ang remittances ng OFWs ay patuloy na nagbibigay ng magandang epekto sa ekonomiya ng bansa gayundin sa pamilya ng OFWs.

Aniya pa, ang pagiging world's top labor-sending country ng Pilipinas ay tinutugunan ng Pilipinas sa pamamagitan ng pagtitiyak na ang skilled OFWs para sa bago at traditional overseas labor markets ay patuloy silang tatangkilikin gayundin pinagpupunyagian ang reintegration program para sa pagbabalik ng OFWs.

Kinikilala ni Imson ang limang OFW host countries bilang leading sources ng OFW remittances: United States, Kingdom of Saudi Arabia, Japan, United Kingdom, at Hong Kong.

"With the OFWs engaged as constructive bridges and as ambassadors of goodwill, these countries and other economies continue to sustain their vibrant economic linkages with the Philippines," anang opisyal. Kung bawat rehiyon, nangunguna ang Middle East, sunod ang Asia, Europe, at ang Americas sa mga nagha-hire at re-hire ng OFWs, ani Imson.

Kabayan News Online

DFA sasaklolo sa bibitaying Pinoy sa Malaysia

2005-01-29T13:58:12Z

Inatasan ng Department of Foreign Affairs (DFA) ang Embahada ng Pilipinas sa Kuala Lumpur na bigyan nang agarang tulong legal ang isang Filipino sailor na nakatakdang bitayin sa Malaysia sa pamamagitan ng pagbigti matapos na mapatunayang nagkasala sa pagdadala ng kalahating kilong cocaine.

Ayon kay Foreign Affairs Undersecretary for Migrant Workers Affairs Jose S. Brillantes, inatasan na niya si Luis Cruz, Charge d’ Affaires na ibigay lahat ng uri ng tulong sa Pinoy na si Nelson Diana, matapos na mahatulan ito ng parusang bitay dahil sa kasong illegal drugs.

Si Diana ay pinatawan ng parusang kamatayan noong Enero 25, 2005 ng Malaysina lower court kaugnay ng kasong drug trafficking matapos na makuhanan ng may 508.6 gramo ng cocaine.

Sa ilalim ng batas ng Malaysia, ang pagkakaroon ng mahigit 40 gramo ng anumang uri ng illegal na droga ay kinokonsidera na drug trafficking at may katapat na parusang kamatayan.

Ipinag-utos na rin ng DFA sa Embahada na agad na iapela ang kaso ni Diana sa Malaysian Court of Appeals (CA) upang mabigyan agad ng remedyo ang kaso ng nasabing Pinoy upang mapigilan ang pagbitay dito.

Binigyang-diin pa ni Brillantes na patuloy na minomonitor ng DFA at ng Embahada ang kalagayan ni Diana habang ito ay nakakulong, kung saan aniya nagkaroon pa ito ng interpreter sa lahat ng isinagawang pagdinig sa kaso nito.

Naipaalam na rin aniya ng DFA sa pamilya ni Diana ang kalagayan nito at bibigyan rin sila ng tulong ng pamahalaan.

Batay sa rekord ng DFA, si Diana ay dumating sa Kuala Lumpur International Airport noong Agosto 22, 2002 para mag-book ng flight nito patungong Bangkok.

Sinasabing ang bagahe na lamang ni Diana ang natira sa baggage claim section ng nasabing airport kung kaya’t nagduda na umano ang mga awtoridad.

Bunga nito ay hiniling ng mga airport police na inspeksyunin ang dalang hand carried bag nito ngunit bago pa man tuluyang nabuksan ay inamin na umano ni Diana na mayroong lamang cocaine ang bag nito.

Pilipino STAR Ngayon 01/29/2005

Ang tsunami at illegal loggers

2005-01-09T07:10:09Z

NAKIRAMAY ang Pilipinas sa mga bansang sinalanta ng tsunami noong Dec. 26, 2004. Nagpadala na ang Pilipinas ng mga forensic expert para tumulong sa pagkilala sa mga biktima. Nag-offer pa ang bansa ng mga mahuhusay na engineers at doctors para sa mga nasalanta. Walang maitutulong na pera ang Pilipinas sapagkat kapos din ang bansa kaya pawang mga mahuhusay na workers na lamang ang inihandog. Grabeng sinalanta ang Indonesia, Thailand at Sri Lanka. Umaabot na sa 163,000 ang bilang ng mga namatay sa tsunami. Umapaw na ang tulong sa mga malalaking bansa gaya ng Australia, Germany at Japan.

Bago naganap ang tsunami sa mga bansang kalapit ng Pilipinas, nauna nang napinsala ang bansa dahil sa pagbaha at pagguho ng lupa. Marami ang namatay sa Real, Infanta at General Nakar sa Quezon; Dinggalan, Aurora; Nueva Ecija at sa Roxas, Oriental Mindoro. Mas naunang umiyak sa pagdadalamhati ang mga Pinoy dahil sa marahas na pagbaha at paggulong ng mga pinutol na kahoy sa kabundukan ng Sierra Madre at iba pang mga bundok. Nahubaran ang bundok kaya lumuwag ang lupa sa malakas na pag-ulan. Animo’y halimaw na naghuramentado ang kalikasan at naningil sa pagtampalasan. Maraming sinirang bahay, schools, tulay, kalsada, simbahan at bibilangin ang taon bago makabangon muli ang mga taga-Quezon, Aurora, ilang taga-Nueva Ecija at taga-Roxas.

Hindi kataka-taka kung ang gobyerno ang sisihin ng dalawang Obispo at 24 na pari sa Infanta, Quezon. Anila, ang gobyerno ang dapat sisihin sa malawakang pagbaha sa kanilang lugar. Hindi nakinig ang Department of Environment and Natural Resources at mga lokal na opisyal sa kanilang kampanya na ipagbawal ang pamumutol ng punongkahoy sa kabundukan ng Sierra Madre. Matagal na raw panahon na kanilang ipinaglalaban na itigil ng mga illegal loggers ang kanilang ginagawa pero walang nangyari. Patuloy ang pamumutol. Nanawagan ang mga Obispo at mga pari na parusahan ang mga illegal loggers at mga kasabwat na opisyal ng gobyerno.

Marami ang namatay at nasirang ari-arian dahil sa kagagawan ng mga "kriminal ng kalikasan". Hanggang ngayon naman, wala pang nagagawa para parusahan ang mga "criminal". Masyadong nagiging abala ang pamahalaan sa mga pininsala ng tsunami sa kalapit bansa. Sana’y ang isunod naman ng pamahalaan ay ang pag-prosecute sa mga "criminal" na puminsala sa buhay at ari-arian ng mga Pinoy bago pa dumating ang panibagong paniningil ng kalikasan.

Pilipino STAR Ngayon 01/09/2005

Namatay si Fernando Poe, Jr

2004-12-15T03:52:17Z

High alert sa burol ni FPJ

Inilagay kahapon ng pamunuan ng Philippine National Police (PNP) sa high alert status ang kapulisan para mangasiwa sa seguridad sa Metro Manila matapos pumanaw ang Hari ng Pelikulang Pilipino na si Fernando Poe Jr.

Nagpakalat ng may 10,000 unipormadong pulis ang National Capital Region Police Office (NCRPO) at Central Police District (CPD) sa Sto. Domingo Church sa Quezon City kung saan ay ibuburol si Da King matapos itong masawi bandang alas-12:01 kahapon ng madaling araw sa Intensive Care Unit ng St. Luke's Medical Center makaraan ang 72-oras na comatose nito.

Sinabi ni PNP chief Edgar Aglipay, bukod sa pagmamantina ng seguridad at daloy ng trapiko ay magtatalaga din ang pulisya ng crowd control dahil sa inaasahang pagdagsa ng mga supporters at fans ni Da King na magmumula sa iba’t ibang lalawigan. Sakaling kulangin ang puwersa ng NCRPO ay kukuha sila ng augmentation force mula sa Region 3 at Region 4 upang maging katulong sa pagmamantina ng seguridad.

Binantayan din ng pulisya ang burol ni FPJ sa Arlington funeral homes sa Pasig City kahapon bago ito dinala sa Sto. Domingo church.

Nagbabala pa si Aglipay na aarestuhin nila ang sinumang grupo na manggugulo sa burol ni FPJ.

Nangangamba din si Sen. Miriam Defensor-Santiago na baka gamitin ng ilang grupo ang pagkamatay ni FPJ upang makapaglunsad ng destabilisasyon dahil nakamatayan ng KNP presidential bet ang protesta nito sa Presidential Electoral Tribunal na hindi nakakamit ang hustisya.

Nakipagluksa din si Pangulong Arroyo sa pagyao ni FPJ kung saan ay inilarawan niya ang naging mahigpit na katunggali sa nakaraang eleksyon bilang isang mabuting tao, isang dakilang Pilipino at isang karapat-dapat na katunggaling pulitikal.

Ipinaabot ni Pangulong Arroyo sa maybahay ni Da King na si Ms. Susan Roces ang kanyang pakikiramay.

Ayon kay Press Secretary at Presidential Spokesman Ignacio Bunye, hindi na dadalo sa burol si GMA subalit magpapadala na lamang ito ng kanyang kinatawan.

Inaprubahan naman ng Senado ang senate resolution 146 na iniakda ni Sen. Jinggoy Estrada na nagpapahiwatig ng pakikidalamhati at pakikiramay sa pagyao ng KNP presidential bet na si FPJ.

Lahat ng 22 senador mula sa oposisyon at administrasyon ay naging co-authors ng nasabing panukala ni Sen. Estrada.

Sinabi naman ni Sen. Ralph Recto, ang tanging magagawa ngayon ng gobyerno bilang tribute kay FPJ ay ideklara itong ‘national artist’ dahil sa naging kontribusyon nito sa Pelikulang Pilipino.

Nagpasalamat naman si Susan Roces sa lahat ng nagdasal at nakidalamhati habang nakikipaglaban ang kanyang mister kay kamatayan.

"Mabigat man sa aming kalooban na ipaabot sa inyo na ang aming mahal, inyong kaibigan at lider na si FPJ ay sumakabilang-buhay na. Sa ngalan ng aming pamilya, nais naming ipaabot ang aming lubos na pasasalamat sa maraming kababayan natin na nagbigay ng tulong at taimtim na panalangin," wika pa ni Ms. Roces sa kanyang statement matapos ideklarang patay na si Da King dakong alas-12:01 kahapon ng madaling-araw.

Humabol naman sa St. Luke's hospital ang anak nina FPJ at Susan na si Mary Grace galing US habang nagpunta din duon ang anak ni Da King kay Ana Marin na si Ronian.

Dumagsa ang mga artista at pulitiko sa St. Luke's Medical Center ng mabatid ang pagpanaw ni Da King habang ang aktor namang si Vandolph Quizon ay gumawa ng eksena ng magwala ito.

(Pilipino STAR Ngayon 12/15/2004)

KASAYSAYAN

2004-12-06T11:06:11Z

Disyembre 6 1896-Nagsimula ang paglilitis sa kaso ni Dr. Jose Rizal. 1891-Pagdating ni Ventura de los Reyes sa Espana upang tanggapin ang kanyang responsibilidad bilang kinatawan ng Pilipinas sa korte ng Espana.

Survivors, lumilikas na

2004-12-06T11:04:42Z

Survivors, lumilikas na

REAL, Quezon-Nagmamadali nang lumilikas ang mga residenteng nakaligtas sa bayan na sinalanta ng bagyo noong nakaraang linggo habang ang mga rescuers ay naghahanap pa rin ng survivors sa bagyong nag-iwan ng mahigit 1,100 patay at nawawala.
Sinalubong sa pier ng Real ang commercial ferries ng mahigit 500 katao na nagpipilit makasakay sa kabila ng 110-kataong kapasidad lamang ng sasakyan.

"It's chaos. People are refusing to get off [the boat]. But we can't force them to get out, because they also want to leave the place," ani Coast Guard chief petty officer, Alberto Taule.

Ang ibang residente ay umaalis sa lugar sa pamamagitan ng pag-arkila sa mga pribadong bangka. Nagkukulang na rin ang supply ng gas para sa mga bangka dahil ang karamihan sa diesel at gasoline sa bayan ay nakareserba para sa mga makinang ginagamit sa rescue operations.

Wala nang uuwian pa ang maraming residente ng Real at ng mga kalapit na bayan ng Infanta at General Nakar, na pinakaapektado sa mga nagdaang bagyo.

Winasak ng sakuna ang tatlong bayan, kung saan 495 katao ang patay at 508 ang nawawala sa unang paghagupit ng bagyo.

Panganib sa karagatan ang dulot ng bagyong "Yoyong" na nagsanhi upang tumigil ang biyahe ng mga ferry sa bayan noong nakaraang linggo.

Hindi pa rin sumusuko ang ilang tropa sa paghahanap ng mga posibleng survivor sa lugar. Binisita ni US Ambassador Francis Ricciardone ang lugar upang makita kung anong tulong ang maibibigay ng Amerika. Habang inaasahang dumating ang team ng US disaster experts upang magbigay ng posibleng tulong.

AFP

Sikat na aktres, kiss & tell

2004-12-06T11:02:37Z

Sikat na aktres, kiss & tell

Lahat pala ng sekreto ng sikat na aktres na ito (na may edad na) ay sinasabi niya sa kanyang bestfriend na isa ring sikat na aktres. Kahit ang sexcapade nito ay ikinukwento, kaya nang lumabo ang kanilang pagtitinginan bilang magkaibigan ay naikwento rin ng aktres ang tungkol sa relasyon ng may edad na aktres sa isang sikat na aktor na naging matinee idol noon.

Ayon sa may edad na aktres ay hindi siya gaanong nasiyahan sa romansa nila dahil hindi nito inaasahan na ang aktor na pinapantasya ng karamihang bading at matrona ay hindi pala nabiyayaan ng malaking kargada.

Pilipino STAR Ngayon 12/06/2004

Army at lover niratrat, patay

2004-12-05T06:01:39Z

Army at lover niratrat, patay

Kapwa nasawi ang isang sundalo at ang live-in-partner nito makaraang tambangan at pagbabarilin ng tatlong kalalakihan sakay ng isang motorsiklo, kahapon ng umaga sa Marikina City.

Namatay noon din sanhi ng tinamong mga tama ng bala ng 9mm sa ulo at ibat-ibang bahagi ng katawan ang mga biktimang sina Victor delos Santos, 29, miyembro ng Phil. Army na nakatalaga sa Camp Bagong Diwa, Taguig at ang live-in partner nito na si Rhea Ann Fernandez, 23, kapwa residente ng Blk. 8, Lot 18, Balubad Settlement Site, Brgy. Nangka ng nasabing lungsod.

Kinilala naman ang isa sa mga suspect na alyas Michael, residente ng Mais St., Tumana Concepcion 1 ng nasabing lungsod.

Sa inisyal na imbestigasyon ni PO3 Orlando Salen, may hawak ng kaso, naganap ang insidente dakong alas-7:30 ng umaga habang naglalakad ang mga biktima sa kahabaan ng Balubad Settlement Site ng nasabing barangay.

Bigla na lang hinarang ang mga ito ng mga suspect sakay ng kulay asul na Kawasaki motorcycle na may plakang UH-7568 na pawang armado ng 9mm. kalibre ng baril at saka pinagbabaril ang mga biktima nang malapitan.

Matapos ang pamamaril ay mabilis na tumakas ang mga suspect sakay ng kanilang motorsiklo subalit nakilala ang isa sa mga ito ng mga nakasaksi sa insidente.

Patuloy naman ang isinasagawang follow-up operation ng pulisya laban sa mga suspect, habang inaalam pa ang posibleng motibo sa isinagawang pagpaslang sa mga biktima.

Pilipino STAR Ngayon 12/05/2004

1 buwan hiling ni Erap para sa surgery

2004-12-04T13:57:53Z

1 buwan hiling ni Erap para sa surgery

KAILANGAN umanong tumigil ng isang buwan sa Hong Kong ang pinatalsik na Pangulong Joseph Estrada para sa kanyang operasyon at recovery sa kanyang tuhod dahil si Dr. Christopher Mow ay magiging available lamang para magsagawa ng surgery sa ikatlong linggo ng Disyembre o sa ikalawang linggo ng Enero.
Ayon kay Estrada, hindi na niya matagalan ang sakit ng kanyang tuhod kung kaya't nais niyang maisagawa ang operasyon sa ikatlong linggo ng Disyembre at idinagdag na kung maaari ay dapat na nasa Hong Kong na siya sa Disyembre 19 para sa isang linggong paghahanda sa operasyon.

Ayon kay Estrada, ang operasyon na may tentative date na Disyembre 27 ay magtatagal ng tatlong oras samantalang ang recovery process ay magtatagal ng tatlong linggo.

"Actually, the recovery, rehabilitation and the observation process would take three months but I would have the continuation of the rehabilitation here in the Philippines," paliwanag ni Estrada.

Patay umabot sa 900 katao

2004-12-03T09:49:01Z

Patay umabot sa 900 katao

REAL, QUEZON-Tinatayang 900 katao na ang kumpirmadong patay o nawawala pagkatapos ng grabeng baha at landslide ngayong lingo, ayon sa militar kahapon.
Ayon sa army tally sa field operations center sa Real umabot sa 484 labi ang narekober 352 ang nawawala sa mga kalapit na bayan ng Real, Infanta at General Nakar.

Samantala, nailikas na sa mas ligtas na lugar ang ilan daang pamilya sa Camarines Sur habang papasok kahapon ang super typhoon na si "Yoyong," ayon sa National Disaster Coordinating Council (NDCC) kahapon. Ayon sa ulat na nakarating sa head office in Camp Aguinaldo karamihan sa mga inilikas na pamilya ay galling sa sa mga bayan ng Tiwi, Libon at Guinobatan, Albay.

Ayon sa ulat, tinatayang 250 pamilya at 75 mula sa Tiwi, 25 sa Libon at 150 sa Guinobatan. Ang mula sa Guinobatan ay malapit ng walong kilometro sa danger zone ng Mayon Volcano.

Nauna nang iniluat na nagbabala ang Philippine Institute of Volcanology and Seismology na dapat ilikas ang mga residenteng malapit sa Mayon dahil posibleng gumuho ang malalaking bato mula sa bulkang Mayon.

Reporter at AFP

10 nakamamatay na bagyo sa Pinas

2004-12-03T09:46:57Z

10 nakamamatay na bagyo sa Pinas

Ang typhoon "Nanmadol," o bagyong "Yoyong" ang pang-26 na bagyo na humagupit sa bansa ngayong taon. Nakahimlay ang arkipelago na may 7,000 isla typhoon belt ng Southeast Asia at madalas na unang bansang binabagyo mula sa Pacific Ocean.
Ayon kay chief weather forecaster, Prisco Nilo, may average na 19 typhoons o tropical storms na dinaranas ang Pilipinas taun-taon.

Ang mga sumusunod ay listahan ng 10 deadliest typhoons o tropical storms na dinanas ng bansa: Disyembre 6-19, 1951: typhoon "Amy," pumatay ng 991 katao.

Oktubre 11-15, 1970: supertyphoon "Joan," kumitil ng 768.

Agosto 31- Setyembre 4, 1984: Tinatayang 1,363 ang namatay sa paghagupit ng bagyong "Ike."

Nobyembre 3-6, 1984: Umabot sa 895 ang nasawi sanhi ng bagyong "Agnes."

Nobyembre 23-27, 1987: Nag-iwan ang supertyphoon "Nina" ng 979 na patay.

Nobyembre 10-14, 1990: Naging sanhi ang supertyphoon "Mike" ng kapinsalaang halos P11 bilyon halaga, higit sa anupamang bagyo mula noong 1947. Pumatay ito ng 748.

Nobyembre 2-7, 1991: Tinatayang naging sanhi ang tropical storm "Thelma" ng 5,000 hanggang 8,000, at pinsalang halos P1 bilyon halaga.

Setyembre 30 - Oktubre 7, 1993: Halos P9 bilyon halaga ng pinsala ang idinulot ng bagyong "Flo" at 576 katao ang namatay.

Oktubre 30 - Nobyembre 4, 1995: Kinitlan ng buhay ni supertyphoon "Angela" ang 936 katao at naminsala ng P11 bilyon halaga.

Oktubre 15-24, 1998: Mahigit 300 ang namatay dahil sa supertyphoon "Babs." Halos P7 bilyon ang napinsala.

Reporter at AFP